Søgan

Ein av elstu bilasølum í Føroyum

Berg Motors telist millum tær elstu bilasølurnar í Føroyum. Tað var í august 1960 at Jóhannes Berg í Havn seldi teir fyrstu amerikansku Rambler bilarnar frá American Motors og setti á stovn sína egnu fyritøku.

Sølan gekk so væl at fyritøkan í 1966 varð heiðrað av American Motors fyri at hava selt flest Rambler bilar í mun til íbúgvaratalið í landinum.

Í 1967 fær Berg Motors teir fyrstu Mazda bilarnar frá japansku Toyo Kogyo bilverksmiðjuni, og 1. mars 1968 varð sáttmáli undirskrivaður um beinleiðis innflutning av Mazda bilum til Føroyar. Sølan av Mazda bilum vaks skjótt um alt landið og fyri at veita kundunum í Eysturoy betri tænastu, keypti fyritøkan fyrst í 70-unum ein bilverkstað á Glyvrum, har ein virkisbygningur seinni varð bygdur.

Berg Motors fekk eisini umboð fyri Chrysler og seldu tá bilmerkini Simca, Sunbeam, Chrysler, Plymouth og Dodge. Síðst í 70-unum var nýggjur virkisbygningur bygdur við Staravegin í Havn og Berg Motors fingu umboð fyri Scania lastbilar og bussar.

Síðan 1993 hevur fyritøkan umboðað Avis bilútleigan.

Í 2004 fekk fyritøkan umboð fyri Suzuki og í 2005 fyri Kia, Subaru, Rover, Daihatsu og Land Rover.